Cruz Vermella lanzou unha nova iniciativa en Galicia. Trátase de CONECTAlab Impulsando a innovación laboral, que ten como obxectivo potenciar a innovación no emprego a través de espazos para reflexionar, debater e compartir as últimas tendencias neste ámbito. A presentación tivo lugar este mércores 12 de xuño no Centro de Servizos Avanzados (CSA) da Cidade das TIC na Coruña e foi a presidenta autonómica de Cruz Vermella en Galicia, Mercedes Casanova Díaz, a que deu a coñecer os detalles.

As sesións desenvólvense seguindo o formato charla-debate. Cada un dos CONECTAlab comezará coa conferencia dun experto que explica a súa visión sobre como a innovación está a transformar o mundo do traballo e que desafíos e oportunidades preséntanse tanto para as empresas como para as persoas traballadoras e, a continuación, os asistentes poderán facer preguntas ou expoñer a súa propia visión ou experiencia.

A temática das tres primeiras conferencias será a intelixencia artificial e o emprego e celebraranse entre xuño e decembro deste ano. Javier Martínez Torres, CEO da empresa tecnolóxica Possible, foi o encargado de impartir onte pola tarde a primeira destas charlas co título “IA e as persoas. Canto de cal e canto de area?”. A súa intervención estivo moi enfocada nas aplicacións que teñen que ver coas persoas e tamén expuxo a cuestión acerca de que hai de realidade e mito en todo este tema e abordou conceptos básicos relacionados coa IA. Unha das conclusións destacadas da xornada é que a intelixencia artificial é unha ferramenta de acompañamento e serve para potenciar as capacidades de cada persoa.

Os CONECTAlab están dirixidos a entidades, administracións, empresas, traballadores e traballadoras, estudantes e calquera persoa interesada no futuro do traballo. Hai dúas modalidades para participar e aprender, xa sexa de maneira presencial ou vía streaming.

Esta iniciativa enmárcase dentro das accións do Plan de Emprego de Cruz Vermella e conta co financiamento do Fondo Social Europeo Plus (FSE+) con cargo ao Programa Estatal de Inclusión Social, Garantía Infantil e Loita contra a Pobreza. Cruz Vermella traballa desde hai máis de 20 anos na promoción do emprego como un dereito fundamental tratando de xerar oportunidades que cambien a vida das persoas, especialmente daquelas que se atopan máis afastadas do mercado laboral.