Un dos nosos retos e obxectivos é potenciar e reforzar a empregabilidade das persoas máis vulnerables. O ano pasado, máis de 2.500 persoas accederon a un posto de traballo en Galicia co apoio de Cruz Vermella e isto serviu tamén para transformar as súas realidades e as das súas contornas familiares.

A pesar dos retos económicos actuais, Cruz Vermella continúa poñendo o foco nos colectivos con maiores dificultades de acceso ao emprego. A finalidade é promover o acceso ao mercado laboral en igualdade de oportunidades e de trato e por iso desenvolvemos accións dirixidas á mocidade, persoas maiores de 45 anos, mulleres que estiveron tempo sen emprego, desempregados de longa duración, persoas inmigrantes ou refuxiadas.

Desde o Plan de Emprego de Cruz Vermella, en 2025 acompañamos en Galicia a máis de 8.800 persoas no seu camiño cara ao emprego. Facémolo a través de itinerarios personalizados que combinan orientación, acompañamento e capacitación técnica.

O éxito destes resultados radica na estreita colaboración co tecido empresarial galego. Na nosa comunidade autónoma, contamos con case 1.200 empresas de diversos sectores que desenvolven actuacións dirixidas a apoiar a estas persoas, non só mediante a contratación, senón tamén a través de orientacións e prácticas non laborais, reforzando a súa Responsabilidade Social Corporativa e contribuíndo a un mercado laboral máis xusto.

Cruz Vermella leva máis de vinte e cinco anos traballando no ámbito do emprego e desenvolvendo diferentes proxectos e programas que fixeron que o Plan de Emprego sexa clave para garantir o dereito a un traballo digno en igualdade de condicións, independentemente da idade, o xénero, a orixe ou a situación socioeducativa.

Grazas ao financiamento do Fondo Social Europeo Plus, Cruz Roja segue impulsando proxectos que promovan a igualdade de oportunidades e a loita contra a precariedade laboral nas catro provincias galegas.

*Esta iniciativa de Cruz Roja está cofinanciada polo Fondo Social Europeo Plus (FSE+) con cargo ao Programa Estatal de Inclusión Social, Garantía Infantil e Loita Contra A Pobreza (CCI: 2021ES05SFPR003).