O obxectivo do Programa FSE+ de Asistencia Material Básica (Programa Básico) da Comunidade Autónoma de Galicia é apoiar ás familias con menores ao seu cargo que se atopan en situación de vulnerabilidade. Este programa está promovido pola Consellería de Política Social e Igualdade e conta con financiamento da Unión Europea e da Xunta de Galicia. Cruz Vermella é a entidade encargada da entrega de tarxetas de compra ás persoas beneficiarias do programa a través da súa rede de asambleas locais.

Estas tarxetas facilitan o acceso a alimentos e produtos esenciais de hixiene que se poden adquirir en calquera dos supermercados do grupo Vegalsa-Eroski.

É importante ter en conta que quedan excluídos certos artigos como produtos azucrados, bolaría, precociñados, precociñados conxelados, refrescos, bebidas alcólicas ou auga embotellada, entre outros.

As tarxetas son de uso persoal e intransferible é non están vinculadas a ningunha conta bancaria nin poden intercambiarse por diñeiro.

As medidas de acompañamento social son un conxunto de axudas, apoios e orientacións que Cruz Vermella ofrece ás familias que reciben a tarxeta do Programa Básico.

1. Programa de Acompañamento Social Xeneral

Está dirixido a todas as familias beneficiarias do Programa Básico. Dispoñen dun plan de acompañamento básico que inclúe:

• Información actualizada sobre recursos sociais, educativos e sanitarios.

• Acceso a materiais formativos sobre hábitos saudables, economía doméstica e educación financeira.

• Coordinación e mediación cos Servizos sociais dos concellos sobre a situación de cada caso.

2. Programa de Acompañamento Social Adaptado a Persoas e Familias en Situación de Especial Vulnerabilidade e/ou Exclusión

Está dirixido a aquelas familias que presentan unha situación de maior vulnerabilidade ou necesidades específicas. A participación é voluntaria e formalízase mediante un documento de compromiso, que se asina no momento de recibir a tarxeta.

As actividades principais son:

• Capacitación en hábitos de vida saudables. Co obxectivo de mellorar o benestar integral.

• Capacitación en administración doméstica. Para mellorar a xestión económica e a organización do fogar.

Asimesmo poñemos ao seu dispor outros recursos de Cruz Vermella, de xeito específico os de apoio e orientación en materia de emprego.

Para resolver calquera dúbida relacionada coa tarxeta ou co funcionamento do programa pódese contactar con Cruz Vermella polas seguintes vías:

• Teléfono: 900 815 353

• Enderezo electrónico: programabasico.galicia@cruzroja.es

*Servizo concertado coa Xunta de Galicia e cofinanciado pola Unión Europea no marco do Fondo Social Europeo Plus (FSE+).

​​​