ExperienciaLab é un recurso que promove unha visión realista e enriquecedora do envellecemento, destacando as capacidades, a experiencia e o valor das persoas maiores, á vez que ofrece experiencias inmersivas para comprender os retos que poden aparecer en determinadas situacións.

É un recurso itinerante de innovación social do que dispón Cruz Vermella en Galicia orientado á sensibilización e formación interxeracional, que utiliza metodoloxías experienciales e inmersivas para promover unha comprensión integral do proceso de envellecemento.

É un recurso cofinanciado con Fondos públicos provenientes da convocatoria do 0,7 % do IRPF da Xunta de Galicia na convocatoria 2024-2025.

O seu enfoque baséase en:

• Perspectiva realista do envellecemento, destacando as capacidades funcionais, a experiencia acumulada e o valor social das persoas maiores.

• Xerar empatía e conciencia situacional, mediante a simulación sensorial e funcional a través de dispositivos e tecnoloxías que reproducen limitacións asociadas a patoloxías que poderían incrementarse coa idade (p. ex., perda de mobilidade, visión reducida, tremores).

• Autonomía dixital e tecnolóxica, a través da transferencia de coñecemento xerada nas dinámicas participativas, talleres prácticos e ferramentas dixitais en contornas cotiás.

• Avaliación do impacto social mediante indicadores de percepción, aprendizaxe e cambio actitudinal, asegurando a sustentabilidade e escalabilidade do servizo (apartado Avaliación).

Nace como resposta a varias necesidades sociais e estratéxicas:
1.    Combater estereotipos sobre o envellecemento. ExperienciaLab busca romper eses mitos, mostrando que o envellecemento pode ser diverso e cheo de oportunidades.
2.    Sensibilizar desde a experiencia, xa que as simulacións e dinámicas inmersivas permiten poñerse na pel de quen enfronta limitacións, pero sen transmitir que isto é a norma. O obxectivo é xerar empatía, non medo, e promover unha actitude inclusiva cara ás persoas maiores.
3.    Levar a sensibilización a todo o territorio: moitas iniciativas concéntranse en cidades, deixando fóra a poboacións rurais. A unidade móbil permite achegar actividades a calquera punto, garantindo equidade territorial.
4.    Fomentar a colaboración interxeracional: o escape room e os talleres están deseñados para implicar a persoas de calquera idade, creando espazos de diálogo e aprendizaxe mutuo.
5.    Integrar tecnoloxía e educación: o uso de realidade virtual, simuladores e material audiovisual para ofrecer experiencias atractivas e actuais.

Contidos dispoñibles

1.    Furgoneta equipada como unidade móbil de sensibilización e formación interxeracional.
2.    Escape room "Escapa do idadismo", adaptado para menores e persoas adultas.    

 

3.    Aula da experiencia: sentir para comprender: simuladores de idade e diversas patoloxías (traxe de envellecemento, EPOC, tremor, dor de costas, hemiparesia, lentes de simulación).

 

 

4.    Simuladores de realidade virtual

 

 

5.    Material audiovisual e educativo para talleres e charlas.

ExperienciaLab é un recurso utilizado desde a rede territorial de Cruz Vermella en Galicia e como apoio á actividade da súa rede de oficinas.  Aínda que o seu obxectivo é traballar con calquera sector de poboación, está pensado especialmente para traballar con administracións públicas e empresas que , pola súa misión, interactúan con persoas maiores, buscando lograr que as persoas que traballan nesas contornas aumenten a súa empatía e colaboren na mellora da calidade de vida dos usuarios dos seus servizos, sen que a idade sexa un elemento relevante.

Se queres saber algo máis sobre esta experiencia, podes contactar connosco en galicia@cruzroja.es