Solidariedade no terreo de xogo: as alianzas de Cruz Vermella con clubs de fútbol - Ahora

• O fútbol tamén contribúe a facer do mundo un lugar mellor. As diferentes iniciativas postas en marcha entre Cruz Vermella e os clubs de fútbol de todo o territorio español deixárono patente en máis dunha ocasión.

Clubs como o Atlético de Madrid, o F.C. Barcelona, o Levante U. D., o Real Madrid ou o Valencia C. F., pero tamén outros máis pequenos, son aliados cos que a organización colabora activamente desde hai anos. Unha relación, nalgúns casos, que vén de lonxe.

A última campaña que uniu o fútbol español con Cruz Vermella titúlase ‘Contra a fame dámolo todo’. Promovida por Diego Pablo Simeone, e a Fundación Atlético de Madrid, esta iniciativa conta xa con sete edicións. O seu obxectivo é recoller alimentos non perecedoiros para distribuílos entre as familias máis desfavorecidas coas que traballa Cruz Vermella. Este ano, a campaña contou coa participación da Unión de Peñas do Atlético de Madrid, que facilitou 161 puntos de recollida en Madrid, Castela e León, Castela-A Mancha e Estremadura. A campaña de recollida de alimentos estaba prevista que durase unha semana, pero finalmente ampliouse ata o 7 de maio co obxectivo de superar as 30 toneladas de alimentos non perecedoiros alcanzados na última edición.

Non é o único equipo madrileño que quixo demostrar o seu lado máis solidario. O Real Madrid, a través da súa fundación, foi outra das entidades que se uniu a algunhas das iniciativas de Cruz Vermella. Fíxoo, ademais, en diferentes ámbitos e sectores. Así, a Fundación Real Madrid, xunto a Cruz Vermella e tamén a Fundación Mutua Madrileña, puxo en marcha en 2020 ‘Compañer@s’, un programa de bolsas para escolas sociodeportivas de fútbol e baloncesto dirixidos a fillos e fillas de mulleres que foron vítimas de violencia de xénero. Cruz Vermella e a Fundación Real Madrid tamén desenvolveron programas de actividade física semanal para persoas sen fogar. A través da práctica deportiva inténtase que estas persoas poidan recuperarse física e emocionalmente.  

A solidariedade vai máis alá do club e moitas veces faise extensible aos seus xogadores. O xogador do Madrid Fede Valverde ou o exfutbolista Arbeloa, tamén colaboraron recentemente nalgunhas das nosas actividades. O primeiro cunha mensaxe virtual (dadas as circunstancias pandémicas do momento) en que convidaba a merendar os residentes do Centro de Acollida Temporal de San Blas; e o segundo, exercendo de embaixador do Real Madrid CF, e presentando a colaboración da Fundación Real Madrid co Sorteo de Ouro de Cruz Vermella. Outros que se sumaron no pasado a algunha das campañas de Cruz Vermella foron o ex-xogador Iker Casillas ou o adestrador Vicente do Bosque

Non importa de onde vimos

O fútbol é un vehículo perfecto para chegar ás persoas mozas. Proba diso é a colaboración que mantén Cruz Vermella en Cataluña coa Fundación Barça desde hai anos que busca sensibilizar sobre a crise dos refuxiados e mellorar a súa acollida nas nosas cidades e comunidades. Ambas as entidades traballan nun proxecto de educación en valores chamado ‘Non importa de onde vimos’, dirixido a nenos e nenas. Ambas as entidades realizaron unha serie de talleres que teñen como elemento central representacións de monicreques que lles transmiten aos nenos de forma sinxela historias sobre a crise de persoas refuxiadas, que os implica activamente e lles permite a adquisición de valores humanitarios. Estas accións chegaron a máis de 4000 persoas e implicaron activamente as familias e o profesorado de primaria.

A última acción levada a cabo entre as dúas institucións é a posta en marcha dun Escape Room dixital dirixido a mozos con idades comprendidas entre os 12 e 16 anos para poñerse na pel das persoas refuxiadas. O obxectivo é promover a aprendizaxe e a posta en práctica de actitudes e comportamentos que melloren a convivencia e o respecto cara ás persoas acabadas de chegar, á vez que se fomenta a empatía e a solidariedade cara á poboación migrante e refuxiada, e se preveñen condutas discriminatorias, racistas ou xenófobas. 

Non imaxinas o que Cruz Vermella é capaz de unir

A vocación por axudar está presente en todos os puntos do país e en todas as afeccións. Tanto o Valencia C. F. como o Levante U. D. manteñen unha boa colaboración coa organización. Así, o Valencia cubriu noticias de Cruz Vermella nas súas canles, e tamén apoiou proxectos propios da organización como o Día da Bandeiriña,  unha tradicional campaña de recollida de donativos que, nesta ocasión, se celebrou virtualmente e onde tamén participou o Levante U. D.
 

O Mestalla, o estadio onde xoga o conxunto che, tamén se converteu nun escenario para compartir, como demostraron algunhas accións emprendidas polo club valenciano. En xullo do pasado ano, o club quixo renderlle homenaxe ao voluntariado que participou no Plan Cruz Vermella RESPONDE, para o que convidou unha representación do voluntariado da área de Emerxencias de Cruz Vermella a realizar o Tour Mestalla o día antes da súa reapertura ao público xeral. 

Cruz Vermella foi capaz, ademais, de unir os dous equipos historicamente rivais da cidade. As afeccións, tanto do Valencia C. F. como o Levante U. D., foron os protagonistas deste emotivo anuncio que demostra o que Cruz Vermella é capaz de unir.  

Outros equipos da Comunidade Valenciana tamén achegaron o seu gran de area. O Villareal C. F. fixo unha repartición de menús durante o primeiro estado de alarma, ademais de gravar un vídeo animando á doazón para o día da bandeiriña. Pola súa banda, o Elche C. F. tamén se uniu este ano á primeira Bandeiriña en liña de Cruz Vermella

Pequenos, pero comprometidos  

Outros clubs deportivos máis pequenos tamén demostraron que non hai límites cando se trata de axudar. En Galicia, a Unión Deportiva Ourense (UDO) rende homenaxe ao seu lema “A forza da Unión” e suma as forzas de todos os seus patrocinadores en beneficio das persoas máis vulnerables atendidas por Cruz Vermella en Ourense. No que resta de tempada, por cada gol que marque a UDO, cada patrocinador doará 10 euros a Cruz Vermella.

Pola súa banda, en Segovia, a Fundación Real Madrid concédelle unha bolsa a quince nenos e nenas atendidos por Cruz Vermella Mocidade para poder adestrar semanalmente. En Valladolid realizáronse accións solidarias de forma periódica que abarcan desde a doazón de móbiles ata a recollida de xoguetes pasando pola captación de fondos e as campañas de sensibilización. Salamanca, Palencia ou León son cidades onde tamén se realizan acordos entre Cruz Vermella e os clubs deportivos.