Hiru aste Tarragonako sorosle taldearekin - Ahora

• Duela aste batzuk amaitu zen Tarragonan Junior Lifeguard Program, Espainian aitzindaria den ekimena, 14 eta 17 urte bitarteko gazteei salbamenduaren eta sorospenaren mundua hurbiltzea helburu duena, izaera ludiko eta hezitzaileko jarduera praktikoen bidez. Hiru astez, 16 gaztez osatutako talde batek lehen pertsonan bizi izan zuen sorospen-postu batean lan egiteko esperientzia. 

Ericek 17 urte ditu, eta 18 urte bete bezain laster sorosle bihurtzeko erabakia. Programatik igaro eta Gurutze Gorriko salbamendu eta sorospeneko langileek egiten duten lana hurbilagotik ezagutu ondoren, oraindik ere haien parte izateko gogo handiagoa du. Datorren urtean, sorosle gisa lan egiteko gaitzen duen ikastaroan matrikulatuko dela dio, eta baliteke udan berak azaltzea beste parte-hartzaile batzuei bere lana.

Sorosleen egunerokotasuna eta ingurune urtarraren ezaugarriak ezagutzera emateaz gain, Junior Lifeguard program-ek kirol-jarduera eta ingurunearekiko jarrera osasungarria sustatzea du helburu. Ikastaroaren iraupena hiru astekoa izan da, eta parte-hartzaileek, besteak beste, hondartzetan eta itsasontzietan oinarrizko erreskate-teknikak, igeriketa-teknikak, lehen sorospenak, kostaldeko segurtasun-neurriak eta ingurumena eta itsas fauna zaintzeko ekintzak ikasteko ariketak egin zituzten.

Jarduerak hiriko hainbat hondartzatan, Tarragona Gurutze Gorriaren Itsas Basean eta Club Natació Tarraco igerilekuan egin dira. Ikasleek, guztira 16, hainbat gairi buruzko saioak egin zituzten, hala nola oinarrizko bizi-euskarriko eta KDAren funtzionamenduko praktikak, igerilekuko, hondartzako eta itsaslabarretako erreskate-simulakroak, Itsas Salbamenduko itsasontziaren bisita, itsas faunari eta ingurumenaren babesari buruzko tailer bat, eta Tarragonako Udaltzaingoarekin solasaldi bat, gorabeherarik gertatuz gero segurtasun- eta komunikazio-protokoloak ezagutzeko. Neska-mutilak Gurutze Gorriko sorosleetako baten itzal bihurtu ziren ordu batzuetan, eta sorosleak bere jardunaldian egiten zuen guztia praktiketako ikasleak egin behar zuena da, Hugo Núñez ikastaroko koordinatzaile eta Tarragonako Gurutze Gorriko teknikariak azaldu duenez. Ikastaroa amaitzeko, Arrabassadako hondartzan larrialdiko simulakroa eta taldekako lehiaketa egin ziren, eskuratutako ezagutza guztiak praktikan jartzeko.

«Sorosleak bere jardunaldian egiten zuen guztia praktiketako ikasleak egin behar zuena da».

Gurutze Gorriak urtean zehar modu erregularrean eskaintzen duen prestakuntzan ez bezala, helburu profesionalizatzailea baitu, oraingo honetan Junior Lifeguard Programek hezkuntza- eta sentsibilizazio-ekintza izan nahi du, adin gazteagoari zuzendua, eta balioak sustatuko dituena, hala nola talde-lana, ingurunearen zaintza, kirol-praktika eta hondartzetako jokabide arriskutsuen prebentzioa.

“Hondartzetako salbamendu- eta sorospen-zerbitzutik antzeman genuen adin-profil horretan zeudela gorabehera gehienak. Beraz, gure ustez komenigarria litzateke gazteei zuzenean azaldu ahal izatea zein diren hondartzetan dauden arriskuak eta nola jokatu behar duten arrisku horiek saihesteko”, gaineratu du Hugo Núñezek.

Ikastaroaren beste helburuetako bat gazteek salbamenduaren eta sorospenaren mundua zertan datzan jakitea da, interesa pizten badie hondartza-zerbitzuan trebatu eta lan egin ahal izan dezaten. Gaur egun, ikastaro horiek ez dira oso ohikoak gure herrialdean, baina beste herrialde batzuetan ere oso zabalduta daude, hala nola Estatu Batuetan edo Australian.