Un asistente virtual para mellorar a calidade de vida das persoas con deterioración cognitiva - Ahora

• AVECEN (Asistente Virtual para o Envellecemento activo de persoas con Enfermidades  Neurodegenerativas) é unha nova  app que, mediante actividades e exercicios, vixía o estado de saúde de persoas con enfermidades  neurodegenerativas. O proxecto, no que participa Cruz Vermella, púxose a proba nun centro de Galicia con moi bos resultados.

AVECEN. Ese é o nome dun novo asistente virtual que busca vixiar o estado de saúde e mellorar a calidade de vida das persoas con enfermidades  neurodegenerativas. Para iso, esta ferramenta tecnolóxica que se utiliza mediante unha tableta, propón actividades e exercicios que serven para monitorar e avaliar de forma constante ás persoas usuarias. Desta forma, ademais, pódese observar unha evolución lonxitudinal da enfermidade. 

A iniciativa, integrada no proxecto europeo  IN-4-AHA (Innovation  Network  for Active  and  Healthy  Ageing – Rede de Innovación para o Envellecemento Activo e Saudable), no que Cruz Vermella participa ao ser membro da Agrupación industrial da Saúde de Galicia, está polo momento en fase de probas. No Centro de Día para Enfermos de Alzhéimer de Celeiro (Lugo) levouse a cabo un  testeo con 15 persoas usuarias de máis de 65 anos con diferentes estadios de deterioración cognitiva durante tres meses, e os resultados non poderían ser máis prometedores.

A iniciativa está integrada no proxecto europeo  IN-4-AHA, e tamén participa nela Cruz Vermella
 

Rocío Martínez, directora do Centro de Día para Enfermos de Alzhéimer, explica que a  app traballa desde a estimulación cognitiva ata a linguaxe pasando polo cálculo, entre outros temas. “Hai un pouco de todo: preguntas estilo selección, identificación de cores, memoria, ditados para comprobar a coherencia nas frases, a dicción ou a pronuncia…”, agrega. 

Na mesma liña exprésase Carlos de Andrés, psicólogo do centro: “Os xogos tratan de potenciar aquelas capacidades mermadas ou sobrecompensar outras para que o estado cognitivo do usuario, se non mellora, desde logo non mingüe”. Despois do confinamento de 2020, moitas persoas quedaron illadas e a deterioración cognitiva foi maior. Por todo iso, este tipo de proxectos busca que a enfermidade avance da forma máis lenta posible e, ao mesmo tempo, mellorar a calidade de vida da persoa usuaria. 

“A aceptación da app é bastante boa”
 

Coas probas obtidas ata este momento, recolléronse datos para incluír melloras no asistente virtual e adaptalo aínda máis ás persoas usuarias. “A aceptación da app é bastante boa. Pareceulles moi interesante, e algo novo e novedoso. Hai que ter en conta que as persoas que a usaron proceden na súa maioría do ámbito rural e é a primeira vez que se enfrontan a un soporte virtual. Gustoulles ver algo novo e sentir que son capaces de facerse con algo que se lles escapaba ao principio”, conta Carlos de Andrés. Unha proba máis da aposta de Cruz Vermella pola innovación e o desenvolvemento de proxectos tecnolóxicos que melloren a calidade de vida das persoas máis vulnerables.